Ofbeldi gegn börnum

Námskeiðið fer fram með fyrirlestrum og eru þátttakendur sérstaklega hvattir til að taka þátt í umræðum. Einnig verða settar upp stuttar verklegar æfingar og unnið með tilbúin dæmi.

Markhópur: allir sem starfa með börnum á aldrinum 0-18 ára.

Efnistök námskeiðsins er ofbeldi gegn börnum. Andlegt og líkamlegt ofbeldi, vanræksla og kynferðislegt ofbeldi. Fjallað er um einkenni, birtingarmyndir og afleiðingar auk þess sem skoðað er hvernig hægt er að bregðast við ef barn segir frá ofbeldi sem það hefur verið beitt.

Námskeiðið er í fjarkennslu á Zoom.

Efnistök námskeiðsins:

• Birtingarmyndir mismunandi ofbeldis gegn börnum.
• Einkenni barna sem beitt hafa verið ofbeldi.
• Afleiðingar ofbeldis á börn, bæði til skemmri og lengri tíma.
• Hvernig við bregðumst við þegar börn segja frá ofbeldi, eða grunur vaknar um ofbeldi.
• Að tala við börn um ofbeldi og þeirra reynslu - unnið með sýnidæmi og stuttar æfingar.
• Barnaverndarlögin og nýju samþættingarlögin. Hvað þýða þau, hvert er okkar hlutverk (sem störfum með börnum) og hvert er hlutverk barnaverndar.

Tími: Miðvikudagarnir 28. september og 12. október kl 13-17.

Ingibjörg Þórðardóttir er félagsráðgjafi, MA, sérfræðingur í klínískri félagsráðgjöf og með diplómanám frá Bretlandi í fjarmeðferð- og ráðgjöf. Hún hefur langa reynslu af því að vinna með þolendum ofbeldis og aðstandendum þeirra meðal annars í Kvennaathvarfinu, Stígamótum og Aflinu á Akureyri. Ingibjörg hefur haldið sjálfsstyrkingarnámskeið fyrir konur og stúlkur, og að auki haft með höndum ýmiss konar ráðgjöf og meðferð fyrir einstaklinga og fjölskyldur. Einnig hefur hún um árabil haldið fyrirlestra og námskeið um ofbeldi, gegn börnum og í nánum samböndum, fyrir stofnanir og starfsfólk sem vinnur með börnum og fjölskyldum.
Ingibjörg stofnaði félagsráðgjafarstofuna Hugrekki – ráðgjöf og fræðslu árið 2013 og þar er hún með samtalsmeðferð fyrir einstaklinga, pör og fjölskyldur. Þá er Ingibjörg frumkvöðull í fjarmeðferð á Íslandi.

Hef lært:

•  hvað er ofbeldi og hversu algengt það er
• að auka þurfi tengsl kennara og leikskóla við barnavernd
•  átta mig betur á hvað hver og einn getur gert, ber að gera og hvernig
•  tilkynningaskyldan, hversu mikilvæg hún er í ljósi þess sem gæti gengið á
•  að fylgja betur eftir „óbeinum“ skilaboðum
• að standa á sinni sannfæringu ef að mér finnst ekki nógu vel búið að barni og tilkynna það.